Splendor Patérnæ glóriæ

✠

Splendor Patérnæ glóriæ,

De luce lucem próferens,

Lux lucis, et fons lúminis,

Diem dies illúminans:

Verúsque sol illábere,

Micans nitóre pérpeti:

Jubárque Sancti Spíritus

Infúnde nostris sénsibus.

Votis vocémus et Patrem,

Patrem poténtis grátiæ,

Patrem perénnis glóriæ:

Culpam reléget lúbricam.

Confírmet actus strénuos:

Dentes retúndat ínvidi:

Casus secúndet ásperos:

Agénda recte dírigat.

Mentem gubérnet et regat:

Sit pura nobis cástitas:

Fides calóre férveat,

Fraudis venéna nésciat.

Christúsque nobis sit cibus,

Potúsque noster sit fides:

Læti bibámus sóbriam

Profusiónem Spíritus.

Lætus dies hic tránseat:

Pudor sit ut dilúculum:

Fides velut merídies:

Crepúsculum mens nésciat.

Auróra lucem próvehit,

Cum luce nobis pródeat

In Patre totus Fílius,

Et totus in Verbo Pater.

Deo Patri sit glória,

Ejúsque soli Fílio,

Cum Spíritu Paráclito,

Nunc et per omne sǽculum.

Amen.

Hymn for Lauds on Monday (Per Annum cycle).