Lux ecce surgit áurea

✠

Lux ecce surgit áurea,

Pallens facéssat cǽcitas,

Quæ nosmet in præceps diu

Erróre traxit dévio.

Hæc lux serénum cónferat,

Purósque nos præstet sibi:

Nihil loquámur súbdolum:

Volvámus obscúrum nihil.

Sic tota decúrrat dies,

Ne lingua mendax, ne manus

Oculíve peccent lúbrici,

Ne noxa corpus ínquinet.

Speculátor astat désuper,

Qui nos diébus ómnibus,

Actúsque nostros próspicit

A luce prima in vésperum.

Deo Patri sit glória,

Ejúsque soli Fílio,

Cum Spíritu Paráclito,

Nunc et per omne sǽculum.

Amen.

Hymn for Lauds on Thursday (Per Annum cycle).