Nox, et tenébræ, et núbila

✠

Nox, et tenébræ, et núbila,

Confúsa mundi et túrbida:

Lux intrat, albéscit polus:

Christus venit: discédite.

Calígo terræ scínditur

Percússa solis spículo,

Rebúsque jam color redit,

Vultu niténtis síderis.

Te, Christe, solum nóvimus:

Te mente pura et simplici,

Flendo et canéndo quǽsumus,

Inténde nostris sénsibus.

Sunt multa fucis íllita,

Quæ luce purgéntur tua:

Tu, vera lux cæléstium,

Vultu seréno illúmina.

Deo Patri sit glória,

Ejúsque soli Fílio,

Cum Spíritu Paráclito,

Nunc et per omne sǽculum.

Amen.

Hymn for Lauds on Wednesday (Per Annum cycle).