Salve Regina

✠

Salve Regína,

mater misericórdiæ;

vita, dulcédo, et spes nostra, salve.

Ad te clamámus

éxsules fílii Evæ,

ad te suspirámus,

geméntes et flentes

in hac lacrimárum valle.

Eia ergo, advocáta nostra,

illos tuos misericórdes óculos

ad nos convérte:

et Iesum,

benedíctum fructum ventris tui,

nobis post hoc exsílium osténde.

O clemens, o pia, o dulcis Virgo María.

V. Ora pro nobis, Sancta Dei Genetrix.

R. Ut digni efficiamur

promissiónibus Christi.